"بحبك يا رسول الله"
كلمات / منصور عياد
بَحبَك يا رسول الله
ويشهد ربنا ف عُلاه
حياتي تحلى بالطاعةْ
وبطّمن بذكر الله
رسالتك كلها رحمةْ
وخليت العرب أمةْ
و أعداءك بتشهد لك
ب إنك أعظم العظمة
ويوم فتْحك لمكة يقول
يا كل الناس دا عفو رسول
مفيش زيّك ف أخلَاقك
وكام نوّرت بيها عقول
يتيم بيعلّمو ربّهُ
وينشر فِي القلوب حبهُ
مُربّي واللي يتعلمْ
بسرعه ينشرحْ قلبهُ
سعادتنا ف إسلامنا
كتاب الله مع السنهْ
وقلت اللي يعيش بيهم
جزاؤه يدخل الجنه
رسول الله يا نور للكَون
فِداك نفسي وعمري يهون
دا حبك خلى أحبابك
على الطاعه حياتها تكون
بِحُبك يا رسول الله
ينول القلب كل مُناه
إلهي كرّمه في علاه
وقال إن الشفاعة معاه
رساله وقام يوصّلها
وكان توحيده أولّها
وصبره على الأذى صابر
لحد في يوم مكملها
رسولنا منهجه رحمه
دعا للحقّ بالحكْمه
حبيبنا هوّ قدوتنا
وبيها نرجّع الهمه
هنوفي لك بكل وعود
وليك شوقنا ما لُهش حدود
يا عالم هوّ قدوتنا
وحسّوا إن لينا وجود
يا عالم فتحوا الأبصار
وشوفوا حياته والأنصار
محمد للوجود أنوار
وصلوا ع النبي المختار
