#تعيشي_تفتكري
#كلمات_ايمن_شتا
بقيتي تعيبي على شكلي
وتشكي وتحكي في مشاكلي
نسيتي كل اللي كان بنا
ما يامة قولتي دي الجنة
هتنسي ولا تفتكري
خلاص بان اللي جواكي
اتاري حبي قواكي
اقولك حاجة..
هنساكي..
وبكرة تعيشي تفتكري
وانا هفضل كدا بشكلي
...
مشاكلي منتي عرفاها
وحفظاها وصماها
تعبت بجد م التفكير
وانتي عايشة في الأساطير
عايزني اكون فارس
ونركب ع الحصان ونطير
لا قدرتي فيوم تعبي
ولا حسيتي بكلامي
ولا طبطبتي على وجعي
يدوب تيجي في احلامي
اقوم م النوم
بقيت مهموم
وزودتي التعب فيا
وبتقولي انا المظلوم
...
ظلمت نفسي وياكي
عشان فكرت يوم فيكي
يا ريت انا قلبي ينساكي
عشان ترتاحي معاليكي
وشوفي الدنيا بعنيكي
وانا هعيشها بمشاكلي
احاول اشتري طقمين
وعدل صورتي أو شكلي
وبكرة تعيشي تفتكري
وتنسي شكلي ومشاكلي
...
دانا فاليوم بنام ساعتين
وباكل لقمة ع الواقف
وبنسي كنت رايح فين
وم الدنيا بقيت خايف
نسيت شكلي مع الايام
بلاقي مشاكلي في الاحلام
دانا مبقتش عارف انام
وانتي تعيبي على شكلي
...
انا مش فارس الاحلام
ولا عنتر ولا همام
تعبت خلاص معدش كلام
شوفيلك حاجة م الأساطير
يكون جني أو ابن امير
يخدك ع الحصان ويطير
وانا هستني بمشاكلي
لا انا شكلك
ولا انتي هتبقى يوم شكلي
وانتي تعيشي تفتكري
وانا هفضل كدا بشكلي
وانا هفضل كدا بشكلي
...
ايمن شتا
ليست هناك تعليقات:
إرسال تعليق