وانت عزوز بديتى
ركبتى قطار العمر وتقاصيتى
بالله ننشدك...
شنهو ريتى...
وقداش فارس بالرموش رميتى
وقداش ما ضحكتى بزهو واجليتى
وقداش ما لبستى سمح وتعريتى
وقداش من حلو الزمان خذيتى
وقداش على صبع الندم عضيتى
وقداش يا سمح الميامى ريتى
بالله ننشدك....
شنهو شفتى....
وقداش ضيفتى وياما ضفتى
وقداش من صافى الحليب رشفتى
وقداش ما قلقتى ع الحباب وخفتى
وقداش دمعك فى الغياب ذرفتى
وقداش ما زرعتى طيبة وعطفتى
وقداش ما على شاهى الحباب حلفتى
وقداش ما تعنطزتى وياما عفتى
وقداش غرفة من العناد غرفتى
وقداش نخلة عالية حذفتى
وقداش حصة فى الجمال خذيتى
وقداش قدروك الناس وتعلليتى...
نبى نفكرك....
قالت ياما شفنا.....
وياما لعبنا فى صغر وتحاذفنا
وياما بمعزة للحبيب حلفنا
وياما زعلنا بود وتقاطفنا
وياما حكينا قصص لسوالفنا
وياما بقينا السعد لمصادفنا
وياما صبرنا ع الحباب وخفنا
وياما سكبنا من دموع ذرفنا
وياما حيينا فرح بمواقفنا
وياما طفينا فرح كان وقفنا
وياما ملينا اطباقنا وغرفنا
وياما صرفنا مال واصرفنا
وياما حكاوى فى شعرنا وصفنا
وشوف وين تيار الزمان حذفنا....
اييييييييه ياما شفنا.........
ياما فرحنا باللبن والخيل
وياما تغزلنا فى نجم اسهيل
وياما عيينا مع الطبول نميل
وياما سهرنا للحبيب الليل
ولايوم من خوف المخاوف خفنا
ولا يوم بعنا عرضنا وشرفنا
وشوف وين تيار الزمان حذفنا......
ايــــــــــه..ياما رينا............
وياما لعبنا فى صغرنا وجرينا
وياما مشينا ع الحباب وجينا
وياما طوينا ليل فى سهارينا
وياما على قصص الغرام حكينا
وياما على قلوب العزاز قسينا
وقداش من شوق الفراق بكينا
وقداش ما كسبنا باطلة وسمينا
وياما حملنا من حمول رزينا
وياما كمينا سر يا غالينا
وليام كانت زهزها فى ايدينا
كلما نفكر فيه بيه تجينا
واليوم هانا عاجزين بدينا
وتقول ما عمر الزمان عرفنا....
وتقول يا نفيسه ما فى زمانك ريتى
العزاز ينشدوا وانتى عزوز بديتى.....
ركبتى قطار العمر وتقاصيتى.......
إبن الحــــــــــاضر.
4/6/2002
ليست هناك تعليقات:
إرسال تعليق