"لعبة الكبار"
لو بتسجّل يا تاريخ
حيلة وشوية تلبيخ
بيوم صحينا متأخرين
وقلنا عنهن نصّابين
هالزعيم وهالوزير
والباقي إلإلهم تابعين
وعملنا ثورة بتصيح
بدنا نطالب بالتصحيح
كان ردّن وعالمكشوف
منكم ما حدا بدنا نشوف
وضربوا منا ناس كتار
شب وصبية وختيار
وبقينا بالشارع صامدين
بدنا حقيقة شو صار
جابوا الكورونا بليلة
ونشروا الخبرية بنهار
تخبّوا يلا كتير منيح
فيروس بيعدي بالريح
غسْلوا وناموا وتغطّوا
ولو حدا حكاكم لا تردوا
وصار بالعالي الدولار
وولعت نار هالاسعار
وتتأمّن أكلات اليوم
صرت ملبّك ومحتار
بلغي الزعتر والزيتون
والّا اللحمة والخضار
والبنك مسكّر على مالك
يا خيّ مالو ومالك
هيدي أمانة عندو
ليه تياخود أمانتك
وصرنا نتلوّى من الجوع
والقلب خِلقَة موجوع
ونحن هلأ محبوسين
مش من كورونا خايفين
بس لإنو جوعانين
وغير الخبز مش طايلين
الْخلَق الثورة الدولار
والخنق الناس الدولار
ريتك بالعدوى يا جار
بتنتشر بجيوب الناس
كانت شبعت بالأساس
وما كان صار إلّي صار
بتفقّع بقلوب الكل
متل حبات البوشار
لما بتطلع يا ختيار
بتولّع كل الأسعار
عمتنشرنا ومش سائل
طالع نازل بالمنشار
يخرب بيتك يا دولار
قلبك شو قاسي وغدّار
يمكن يبرم هالدولاب
وتوقع بإيدي شي نهار
ساعتها شو بدّي ذل
فيك وولّع قلبك نار
فاطمة البلطجي
لبنان /صيدا
ليست هناك تعليقات:
إرسال تعليق