يا وارده والقُلٌه على الآكتاف..
يا وارده والقُلٌه على الآكتاف
البير بعيد وخطوتك بالرٌنٌه
ومخلولك مشتاق في طلٌتك يستنٌى
سيري وزيدي ترنٌحي ما تحيري
ومن موعدك لا تخاف
وغثيث الشٌعر مسمحه
هايف على الأكتاف
بشربه من جرٌتك غيثيه
روفي عليه وللحسره ما تخلٌيه
نهاره صعيب عليه
مشواره طويل ومبكٌر من الفجريٌه
ريقه شايح متوحٌش خيال غزاله
خايف من الحسٌاد والورٌاده
والشٌمس السٌاطعه الحراٌقه
زادت على المخلول تشوي كبده
عجٌلي بالخطوه وسايسي عليها القُلٌه
تكسيرها يحرمه من شربه بارده ما احلاها
تنسٌيه في عطش سنين يا مخلوله
غير قرٌبي للبير خطوه خطوه
الدٌلو من البير نا نخرٌجه في لحظه
وتتعبٌى الجرٌه ومن ايدين الغاليه
الٌمٌيٌه البارده نشربها
يمشي العطش ونروى
غير عجٌليها الخطوه واسبقيهم جمله
قبل ما الورٌاده عيونهم تكشفنا
والخبر لأهلك يشيع ما يبطاشي
غير عجٌلي في الخطوه
وحاذري عليها الجرٌه
وبحرامك اللٌمٌاع يتجرجر تلٌفيها الجُرٌه
وكحلك على العينين
والوشم على الخدٌين زادو ف زينك
غير عجٌلي اخطاويك هيٌا اوصلني
ورنٌه صوت الخلخال في رجليك
عجٌلي سمٌعني .
صلاح لافي / تونس.
ليست هناك تعليقات:
إرسال تعليق