قصيدة شعبية تحت عنوان{{إزيك}} بقلم الشاعر المصري القدير الأستاذ{{مدحت مصطفى}}

إزيك..

إنتي حلوة..؟..

مبسوطة معانا..

أهم حاجة تكوني مبسوطة وفرحانه..

مين إنت؟..

عابر سبيل مشيت كتير على أراضك

غلبت أعافر ومحافظ على فرضك..

ودا كله لأجل أكون صاين عرضك ..

إسمك إيه؟..

ولد من ضمن أولادك..

ويمكن وتد من ضمن أوتادك..

لا الإسم يفرق ولا الشكل كمان واللون..

سماري عاشق الحلوة وفي عشقك أنا المفتون..

كفاحي مهر  وراضية تخليني أعيش مديون..

وعرضك طُهر  وفاكره إني ليكي ما أصون..

وإن بوحت بكلمة حق في اللحظة أكون مسجون..

وتهمك جاهزة ومغلفة دا الخاين ودا المجنون..

دا إللي يهز أركانك خسيس واطي ليكي ومرهون..

طب أهدى وخف على حالك..

وقولي يا ولدي إيه مالك..

أقولك أيه وأعيدلك إيه..

مهو حالك صبح مكشوف..

وكل الخلق محكومة بصوت من خوف 

دي دايرة واسعة من الأنجاس..

دا باشا بيه ودا حارس من الحراس..

بينهب فيكي صبح وليل..

وفي على نهبه ألف دليل..

وزيرك سارق السكة..

وغفيرك واخد الفكة..

وطفحه قبيح وقوله نتان..

ويتحلف ويتيمن أنا الإنسان..

ولامم في القصور شلة..

لصوص معدومة الملة..

وفاكر إننا مهابيل..

فاجر جاحد وجهده عويل..

عجيب قولك يا ولدي عجيب..

دا أقسم إنه ليكوا طبيب..

طبيب ومداوي أحزانكم وقالي انه أحلى حبيب..

حبيب أهله حبيب ناسه..

حبيب بطنه وحراسه..

وباع أرضك بكل خنوع..

وزاد فقرك وزاد الجوع..

ومالي سجونه بولادك ..

وسهلها لحسادك..

شكينا وزادت الشكوى ..

هرمنا وكبرت البلوى..

وباع جزرك وحتى المشفى فرط فيه..

ونسأل فين راح مالنا..

يقول في القصر انا ببني..

ونسأل شغله لعيالنا..

يقول أسكت كمان هابني..

يا عم إزرع يا شيخ علم..

يقول أخرص ما تتكلم..

يابا الأسعار بتدبح دبح..

يزيد أكتر ويؤمر عاهرين بالنبح..

طب الأسماك دي راحت فين..

يقول ثروة حوده وصاصا..

أثار أجدادنا تتهرب..

يقول أخرص هتتكهرب..

ونورنا فين..لمين بيروح..

يقول حصة لوا نحنوح..

عيالنا تايهة في السكة..

كتير إحنا وجوعنا كتير..

يقول أقبض عليه يا غفير..

عبيط وأهبل ما قصولك مين راح أكون..

أنا إللي أقتل الفاجر وأنا إللي أدبح إللي يخون..

أنا المصري وصبري عزة وأصالة..

سواد فجرك لو تكسر نفس رجالة..

وحق الله ما هنخلي..

عويل فاجر على أرضك..

هنمسح كل خطوة عهر..

وترجع مهجة لأولادها..

عزيزة وغالية يا بلادي 

صباحك خير صباحك نصر..

ما خفنا يوم ولا ساعة..

ولا هنخاف لطول الدهر..

قوية يا بلدي بولادك..

وهتغني بناتك فخر..

عزيزة يا مصر يا أبية..

عزيزة يا بلاد القهر..

هنقهر كل من خانك..

وندفع ليكي أجمل مهر..

ونحمي ألأرض وسماها..

ويرجع كل شبر في بحر..

ونرقي قلوبنا بالقرأن..

فيبطل كل كيد السحر..

بلد عزة ذكرها المولى في أياته..

ونتهنى بلمتنا في أجمل نهر..

نلحن أصفى أغانينا..

عزيزة يا مصر ..حبيبة يا مصر..

وصياد يرمي لنا شباكه..

فصيده يشبع إللي جاع..

وفلاح يروي لنا البستان..

فنحصد خير ونزرع زهر..

ودا عالم ودا ماهر ودا خباز..

عمار يا بلدي يا قوية بلاد الطهر..

وأقولهالك.. وأحفظوا قولي..

مَهَلتك يا خسيس القوم تمام الشهر..

د.مدحت مصطفى