شحات الغرام
عيونك قصيدة محفورة
على جبيني والجداريات
وكل م أشتاق لها أهوىٰ
سحر الرمش والنظرات
وعيونك محمية طبيعية
مش ملكك دا لها مزارات
جايبة السحر دا كله منين
حلاوة سحر اللوغاريتمات
فيهم صعوبة مواد ثانوي
كيميا وحساب مثلثات
تضعف عنيا لنظرة عنيك
زي الشمس ألبس لها عدسات
لو مر لحظة من غير م أشوفك
كأن العمر كله عدا وفات
شرطة عينيك هلال رمضان
فيهم هيبة وسحر نايات
نظرة حادة ورمش كحيل
وحسن ورهبة ف العبرات
فرشة وبلته وألوان طيف
ولوحة ف جناح فراشات
عيونك بحر ورمشك شط
وكمان موج و دومات
أمشي مجذوب ف أرض الله
تاخدني عينيك والمدارات
والناس تقول يا حول الله
الحب جاب له تهيؤات
والف الدنيا وأرجع لك
وأقف على باب الغرام شحات
كلماتي:
الشاعر: حليم محمود أبو العيلة
مصر
ليست هناك تعليقات:
إرسال تعليق