موال الأَمور
👄(موال الأمور)👄
الحب مش عيب
لما يكون فى النور
ويكون فى آخره زواج
وبيت جميل مستور
ونخش للناس م الباب
ونقول إحم دستور
ونقول سلام عليكم
ويقولو يادى النور
ياللى انتا ماشى
تلف بالبنات وتدور
عمال بتتسلى بيهم
وبشكلك كده مغرور
وشيطانك يقولك انتا
الواد الأمور
خاف على أختك
دالزمن بيلف ودور
إللى بيخون ويزنى
بيصيبو نفس الدور
وبوكره تندم وقلبك
يرتمى مكسور
مافيش عليها شطارة
دكل شيئ مسطور
فيه ملايكه بتكتب
عملك الجهرى والمستور
فيه موت وفى قيامه
وعذاب شديد محظور
فى القبر خود طله
أوم روحله يلاّ زور
وانتا تشوف النهايه
فى متر ظلام مهجور
لوكنت عايز السعاده
فى الدنيا يا أمور
تعيش فى نور الإيمان
لا تعصى رب شكور
وامشى ف طريق الحلال
وكن تقى وطهور
الجنه بالأخلاق مش
بالفساد والزور
الجنه فيها نعيم
ودهب بيوت وقصور
الجنه فيها السعاده
وفيها البنات الحور
وزرابى مبثوثه
واللؤلؤ المنثور
امشى ف طريق الله
خليك عفيف وغيور
ع الحوض يناديك محمد
بكل رضا وسرور
يسقيك بيده الشريفه
شراب لذيذ وطهور
ان كنت عايز الجنه
إلجأ لرب غفور
وصون بنات الناس
واوعى عليها تجور
وبلاش بكسر الخواطر
تكون سعيد وفخور
داللى يهين النسا
للنار بكون محشور
(موال)
(شاعر الإحساس)
(رضا عبد الحميد)
